政情：高官一日環保交足戲

十二名問責局長當中，邱騰華、保安局局長李少光同運輸及房屋局局長鄭汝樺，尋日都係選擇搭港鐵返工，教育局局長孫明揚就搭巴士，民政事務局局長曾德成坐小巴，勞工及福利局局長張建宗同財經事務及庫務局局長陳家強就坐屋苑村巴。至於公務員事務局局長俞宗怡，發言人只肯透露佢係搭公共交通工具返工，至於係乜交通工具？Sorry，唔講得喎。

其餘幾位局長，政制及內地事務局局長林瑞麟同食物及衞生局局長周一嶽尋日都休假冇返工，商務及經濟發展局局長劉吳惠蘭就請咗病假，發展局局長林鄭月娥就仲喺挪威訪問緊。我哋中午又喺中環香港會出面撞到金管局總裁陳德霖，佢尋日就步行往返位於國金嘅辦公室同香港會。