中環出更：賭王小禮物三太好幸福
賭王何鴻燊連月來安在家中休養，間中外出鬆一鬆，好似上周就同三太陳婉珍一房人去中環四季酒店歎High Tea，顯得精神奕奕。卓妮日前喺港區省級政協委員聯誼會就職晚宴上，見到身兼廣東省政協嘅三太，佢孭住個白色Chanel手袋，仲戴住大大粒嘅珍珠頸鏈、耳環及戒指，莫非三太喺High Tea後又收到賭王嘅禮物？
三太好開心話，身上套珍珠首飾確係賭王送畀佢嘅禮物，但因乜事要送禮物呢？三太話：「何生經常都買小禮物送畀我㗎啦！」嘩！小禮物都咁貴重，大禮物咪不得了？三太聽後笑而不答，幸福多到滿瀉晒！據聞賭王精神愈來愈好，三太就話賭王每逢愛駒出賽，都會睇電視賽馬直播，幫愛駒打打氣嘅。