政情：阿Paul組團華山論政
今屆立法會可謂多事之秋，班議員嘅口舌之爭由議會內漫延到議會外，難怪旅遊界議員謝偉俊上星期去華山旅行，都不忘記掛住佢班立會「好同事」。「華山論劍」家喻戶曉，但係阿Paul去到，居然忽發奇想，想邀請一眾同僚上華山「論政」，仲直言復會後會積極研究點樣組團一齊去喎。
阿Paul上星期同幾位旅遊業界朋友到西安辦公事，難得去到當地，當然要把握機會上華山見識見識啦。
阿Paul話，要攀華山並非易事，事關靠吊索上到半山後，仲要徒步行四至五個鐘先可以到山峰，相信愛人白姐姐唔會適合去，佢自己亦行咗個半鐘頭就鳴金收兵嘞。
第一次去華山嘅阿Paul，形容華山好有靈氣同歷史背景，不過上到去嘅時候，佢唔係想同人論劍，而係論政：「希望大家去到嗰度都可以收口，乜嘢唔掂都拆掂佢啦！」唔好以為阿Paul講講吓，佢一臉認真咁話，復會後會積極組團約班同事共赴華山，仲話之前大家已經有坐高鐵到上海嘅「出團經驗」，有信心搞得成喎！