政情：卿姐：無敵最寂寞
立法會財務委員會主席下個月又改選，連續做咗兩年主席嘅民主黨立法會議員劉慧卿，本來想表現得謙讓啲，但又忍唔住話「無敵是最寂寞」，事關今次可能又喺無對手之下勝出。選舉嘅嘢未到最後一刻都未知鹿死誰手，卿姐都係做足準備好啲。
其實今屆立法會開齋嗰陣，卿姐以兩票之差險勝有「IQ博士」之稱嘅立法會中總代表黃宜弘，舊年就更加係喺無對手情況冧莊連任。難怪話到嘴邊想吞番落肚嘅卿姐，忍唔住慨嘆「無敵是最寂寞」，仲話佢都鼓勵現任嘅財會副主席劉秀成同佢鍊過！
不過卿姐深知選舉嘅嘢絕不能輕敵，所以尋日佢同傳媒講，上個月已向全部議員發信拉票，仲不忘向記者打探有無其他對手。至於成功連任嘅機會大唔大呢，卿姐就話估唔到啦，事關佢都唔知班議員會點樣投票，而且點樣投票都唔喺佢控制範圍之內喎。