中環出更：戴德豐買馬有Lucky冧巴
港區省級政協委員聯誼會話咁快就成立四周年，前晚喺會展舉行第三屆理事會就職典禮，筵開八十席，各省級政協委員聚首一堂，卓妮見到全國政協常委陳永棋、金城營造主席王國強、恒生銀行副董事長梁高美懿、協成行董事總經理方文雄、聯誼會永遠名譽會長張永珍及副主席包陪慶等，主席林樹哲與會長戴德豐就忙於招呼賓客。
買四場中三場
卓妮同外號「零食大王」嘅四洲集團主席戴德豐傾開賽馬，發現佢投注買馬屢有斬獲，原來佢並非擁有必勝秘笈，而係每次下注都必定選擇最旺自己嘅四個幸運號碼，包括一、八、九、十一。戴德豐話，一號係佢座駕車牌號碼，八號係屋企電話號碼其中三個數目字，九號係佢飛鵝山大宅門號，至於十一號，就係十一月十一日結婚紀念日。
戴德豐呢四個冧巴好使得，好似喺去年十月沙田馬場觀瀾湖錦標賽事中，佢就買中九號馬，即係理文造紙主席李運強愛駒「包裝大師」，結果中咗百幾倍大冷門，獨贏派一千六百元，認真和味。戴德豐仲話，喺佢記憶中，一號都經常中，有次買咗四場賽事都係一號馬，結果中咗三場，好彩到你唔信。不過，呢四個冧巴旺佢，但唔擔保旺大家，跟唔跟就自行決定喇！
卓妮睇過就職禮場刊，發現好多會員同友好都踴躍捐款，其中政壇富婆張永珍與兒子鄭建山就分別捐出一千萬元及一百萬元，信和置業主席黃志祥都慷慨捐咗五百萬元，戴德豐同林樹哲就各捐三百萬元。戴德豐前晚見到張永珍，立即話要多謝阿姐捐錢。問張永珍點解咁大手筆，佢話捐錢畀聯誼會能夠幫到國家做事，況且佢成日捐錢㗎啦！
除咗聯誼會，「棋哥」陳永棋揸旗嘅友好協進會早前都獲得好多政商界猛人贊助，大部分捐款以百萬計，好似福建幫頭領盧文端捐咗二百萬元，所以棋哥前晚喺就職典禮對住盧文端話：「呢個係我哋協進會嘅台柱呀，喺呢度同我影相嘅全部都要捐二百萬㗎！」不過，佢見到湖北首富、嘉應商會會長梁亮勝就改口話：「呢個捐二百萬就唔得嘞，起碼要二千萬啦！」棋哥兜個彎來讚梁會長身家豐厚，真係識講嘢。
卓妮同場又見到梁高美懿。講開又講，佢嘅女兒剛剛加入咗菁英會，為第九期同學，果然後生都係活躍分子。
卓妮