政情：飛天朱新疆滑翔玩自拍

朱幼麟今次係應內地一個叫藍色氣流滑翔傘俱樂部嘅組織邀請參加比賽，全國一共有三十幾人參加，而香港代表則有三個，飛天朱係其中之一。佢話，今次比賽雖然冇得獎，但就認真難忘，因為嗰度嘅風景真係靚到你唔信，不愧有人間淨土嘅美譽。飛天朱今次去咗四日，頭三日因為氣流問題唔可以比賽，所以佢就去參觀一個國家原始森林。

幸好最後一日氣流穩定，終於可以比賽。飛天朱特別提到，喀納斯地處海拔二千幾米，所以空氣非常稀薄，能夠完成賽事已經好滿意，加上可以喺天空欣賞咁靚嘅風景，實在係不枉此行。