政情：職安健常識葉偉明不敵梁美芬
工聯會葉偉明同專業會議梁美芬兩位立法會議員尋日出席職業安全健康局、勞工處等合辦嘅職安健常識問答比賽，除咗擔任嘉賓之外，兩位仲親身落場參加埋「名人版」環節，同盧覓雪及謝雪心兩位演藝界人士組隊比賽。葉偉明係立法會勞工界代表，對職安健嘅問題理應駕輕就熟，比賽開始後冇幾耐佢嗰組其實一直領先，點知去到中段佢竟然連錯幾題，搞到畀人扣分，對手仲後來居上添，而佢嗰組最終包尾收場。
葉偉明事後笑笑口話，輸贏真係好閒，最緊要多啲人留意呢方面嘅知識；佢以前經常處理工友受傷或者死亡嘅索償個案，不過近年就真係少掂咗，加上比賽問嘅問題太專門，所以佢都識唔晒。至於爆冷勝出嘅梁美芬亦好謙虛，話職安健知識其實對佢從事法律工作好有用，因為喺處理工業傷亡案件時可以較易判斷誰是誰非，加上職安健問題其實連做文職都需要留意，所以佢都好支持咁話。
