政情：阿涂孱弱懶做運動
立法會議員貴人事忙，唔係要睇文件，就係要開長命會，一日坐成十個鐘，絕對有需要定期做運動舒展筋骨。不過白鴿黨議員涂謹申尋日就自爆勁少做運動，仲話要有人book晒場，佢先至每月勉強戥腳打一次網球。估唔到做嘢唔算懶嘅阿涂，喺運動方面咁有惰性喎。
尋日無家者世界盃香港代表隊同深水埗警隊踢咗場友誼波，阿涂晨咁早就去撐場，不過因為佢要返教會，所以就冇落場踢番兩腳。阿涂話佢見到大家踢波都有啲「心癮」起，但笑言自己唔係好夠氣，踢十幾分鐘就會氣喘，一定要不斷換人先得，似乎同佢平時喺立法會嘅「長氣袋」形象有啲出入噃！
佢又話自己平時好少運動，係早前有個前輩八十歲先學打網球，會定期book場同約埋教練「餵波」，佢先至落場戥腳，不過只限每月一次，運動量同八十歲伯伯差唔多。港府依家提倡一星期做三日運動，睇嚟阿涂要加把勁先得！