俄軍挫新西蘭打出火
【本報綜合報道】俄羅斯八強挑戰「夢九」！俄羅斯男籃尋日喺世錦賽十六強賽事中，略帶火藥味下以78比56擊敗新西蘭，繼○二年後再度殺入八強，而對手將會係愈戰愈勇嘅美國「夢九」。美國在較早時間大炒安哥拉55分，打出今屆賽事最「夢幻」一仗。
於分組賽表現不俗嘅俄羅斯，今場續有上佳演出，雖然首節一度落後２分，但球隊喺紐約人新中鋒莫斯哥夫及大前鋒禾朗施域治支配內線下，第二節已經反先對手。完半場前則發生一段小插曲，雙方球員在一次爭球下滾在地上，新西蘭前鋒甘馬隆在混亂中被禾朗施域治打中頭部，兩軍球員隨即一擁而上，引發一陣小騷亂，幸好雙方都能控制情緒，未有演變毆鬥，最終俄羅斯大勝新西蘭22分。
比立斯入５個三分球
另一場八強賽事，美國「夢九」打出代表作，領袖比立斯三分球７射５中，攻入最高19分，而杜蘭特、基爾及艾歷哥頓亦分別貢獻17分，領球隊大勝安哥拉121比66，刷新美國在今屆賽事單場最高得分及大勝比分差距。美國與俄羅斯出線後，將會在八強互撼。至於今晚舉行嘅八強賽事，頭場有塞爾維亞對西班牙，尾場則上演土耳其對斯洛文尼亞。 （有線62台及202台周三晚11時直播）