政情：黃靜文對吳儀印象深
政制及內地事務局副局長黃靜文尋日出席香港青協一個公民教育活動，與一班青少年真情對話，言談間好崇拜被視為「中國鐵娘子」嘅前國務院副總理吳儀，仲盛讚一度捲入桃色醜聞嘅前美國總統克林頓好叻，莫非佢以兩人為榜樣？
九四至九九年間處理過亞太經合組織（APEC）工作嘅黃靜文，盛讚當時做緊外經貿部長嘅吳儀談吐清晰、誠懇，面對中美貿易問題保持堅定立場，令佢留下深刻印象。不過講到政治偶像，佢斬釘截鐵話「無」，但提起克林頓時，不禁讚嘆「點解佢可以咁叻」。佢話好似台灣總統馬英九咁嘅政治領袖，上場初期都有蜜月期，但過後民望隨即下跌，香港亦無例外，唯獨克林頓長期維持不俗民望，即使一度受萊溫斯基事件影響而下跌，最終都回升番。
黃靜文口中呢兩位政治人物，曾經叱咤風雲，一眾副局政助有無呢種能耐，依家就睇唔到佢哋有呢種潛質。講番今日出發嘅副局政助上海團，黃靜文都有同行，佢話早幾個月國務院港澳辦已邀請佢哋去上海，只係雙方要夾時間，至等到依家先出發；仲辯稱即使成班副局政助集體「消失」，工作都有同事負責喎，咁即係可有可無喇！