政情：參觀誠品書店鬍鬚曾出醜

鬍鬚曾形容，今次訪台係「灌溉之旅」，種唔種得出港台經濟成果未知，不過，檸檬就已經送咗兩大個出去。鬍鬚曾尋朝早十點半參觀台北誠品書店信義旗艦店，書店盡地主之誼，安排簡報會，吳清友見香港高官到訪，更加把握機會提出協助來港開業訴求，點知所託非人。

吳清友借致詞向鬍鬚曾訴衷情，指誠品書店想喺香港開枝散葉，中環、銅鑼灣同九龍區都係心水地點，只可惜香港租金太貴，希望獲港府協助，但港府一直無任何承諾，誠品只好「一切隨緣」咁話！現場再蠢嘅人都聽得出，吳董想鬍鬚曾識做幫幫手，但係緊接上台發言嘅鬍鬚曾，完全唔識反應，令吳董當場食咗個大檸檬。其實誠品想喺香港開店，都唔係第一次提出，鬍鬚曾到訪又冇準備伸出友誼之手，咪即係混吉？搞到人家碰到一鼻子灰。

主人家致詞 曾太玩失蹤

其後，鬍鬚曾安排參觀書店時，被記者追問誠品想來港開店問題，佢答：「好呀，很好，好歡迎。」鬍鬚曾好可能自知失儀，下午參觀故宮時，先至補飛指會研究有乜幫到手，又話對港台免簽證呢類有益兩地嘅事，港府都會考慮。其實鬍鬚曾以港台經濟文化合作協進會榮譽主席訪台，任務就係促進港台經貿，但以鬍鬚曾尋日嘅表現，似去台灣趕客多於招商喎。

俗語話夫唱婦隨。鬍鬚曾對誠品來港開業愛理不理，曾太黃蓮華對主人家嘅招待一樣漫不經心。吳清友致詞完畢，大會宣布由吳董送紀念品畀曾太，但係，成場人等咗好耐，都唔見曾太上台。原來曾太未等到吳董致詞結束，唔等主人家講完嘢就走咗去，又無向大會交代，所以釀成尷尬場面。雖然最後由商務及經濟發展局局長劉吳惠蘭上台代領紀念品，但已令吳董無端端又食多次檸檬。