政情：台灣幫撐博愛支援自閉童
由光華新聞文化中心、博愛醫院同埋曙光影視發行公司聯合舉辦嘅「台風星光影展」，上周四晚喺會展舉行慈善首映，由九月四日至十一月止，合共十一部台灣電影將安排於兩間戲院放映，部分票房收入將捐畀博愛醫院。當晚台灣駐港機構空群而出，光華新聞文化中心主任羅智成打扮得官仔骨骨，同佢平日着到好似黑影咁好唔同，做善事心情係唔同啲。
羅智成推廣寶島文化
博愛醫院一眾高層亦攜伴出席，主席黃帆風伉儷、副主席湯修齊夫婦都現身盛會。當晚放映講述自閉症嘅紀錄片《一閃一閃亮晶晶》，黃主席話，希望藉此讓社會人士了解自閉症兒童，而今次籌得嘅善款將用於支援自閉及學習障礙兒童嘅服務。湯修齊仲特登帶埋一對子女嚟睇戲學嘢，但影片長達兩小時，散場時已經係深夜十一點幾，遺傳咗爸爸高大身形嘅五歲囡囡瞓咗覺，所以要爸爸好吃力咁抱住佢行去停車場攞車，慈父都唔易做㗎！
羅智成話，佢正籌備緊一年一度嘅「台灣月」活動，希望將多元化嘅台灣文化引入香港，加深港台文化嘅進一步交流。