中環出更：陳仲尼鄭志剛當選全國青聯副主席
被視為進軍內地政壇大跳板嘅第十一屆全國青聯尋日閉幕，五年一次換屆選舉落幕。一如所料，香港青聯主席、製衣大王陳元鉅兒子陳仲尼（Rock）同新世界發展主席鄭裕彤長孫鄭志剛，順利當選副主席，接替因年滿四十五歲而須卸任嘅前全國人大常委曾憲梓兒子曾智雄同「新金王」黃英豪。另有十一名港人當選常委，包括已故「霍老」霍英東長孫霍啟剛、觀瀾湖球會主席朱樹豪大兒子朱鼎健、福建幫頭領施子清兒子施榮忻等，城中富豪名人二代新一輪接班大功告成。
鄭志剛有反對票30張
新一屆全國青聯一千四百個委員中，港區佔八十人，最矚目係副主席之爭，投票結果亦相當有趣。阿Rock得支持票一千一百幾張，全數十六名副主席中排第八，反對票十六張，而鄭志剛反對票就有三十張，而施榮忻、朱鼎健、香港青聯前主席許華傑同姚祖輝、菁英會副主席洪為民等八名常委以攞全票姿態當選。
阿Rock同卓妮講，返港後會隨即與其他港區嘅全國青聯副主席同常委開集思會腦震盪，規劃未來五年嘅青年工作。對反對票嘅問題，佢話可能今次副主席位置競爭激烈，加上部分內地委員唔認識佢，所以至攞十六張反對票。至於鄭志剛攞反對票多過佢近一倍，阿Rock就話唔評論嘞，叫卓妮自己問志剛。
全國青聯副主席嘅入圍名單，先後經過中聯辦、共青團、統戰部、中央組織部等「過濾」，一啲都唔簡單，國家副主席習近平出席開幕式，共青團出身嘅全國人大副委員長王兆國就開幕、閉幕都去齊。會議期間，全國政協港澳台僑委員會辦公室（七局）局長呂虹，仲抽時間同新一屆全國青聯港區委員及部分菁英會成員見面交流，菁英會創會會長施榮忻、莊士集團主席嘅兒子莊家彬、福建幫頭領楊孫西兒子楊華勇同盧文端兒子盧金榮、工總立法會代表梁君彥兒子梁宏正、總商會立法會代表林健鋒兒子林凱章同全國政協委員王國強兒子王紹基咁，一班富豪名人二代齊齊亮相。
卓妮