政情：王英偉任藝發局主席
人稱星爸嘅港區人大代表王英偉堪稱「公職王」，一向樂於服務社會嘅佢喺尋日大除夕又有新動向，獲特首委任為藝術發展局主席，接替做足六年離任嘅馬逢國。尋日我哋搵到王英偉，佢話嚟緊兩年藝發局工作繁重，因為政府希望推動本港藝術團體發展，等佢哋將來充分利用西九文化區嘅設施，藝發局要作出相應配合，而作為主席嘅佢手揸藝團撥款大權，工作唔易做，佢話自己嘅宗旨係公平公正。
加埋藝發局任命，王英偉已有六項公職在身，以政府「六六制」嚟計已到頂，加埋自己嘅正職，名副其實係日理萬機。不過身為星爸嘅佢，對囝囝創作歌手王梓軒一向跟到足，好似早幾晚囝囝喺新城電台勁爆頒獎禮上攞到勁爆創作歌手獎，王英偉同太太都到場支持。佢話阿仔今年升咗級，唔再係新人，要同一班「哥哥姐姐」爭，有咁嘅成績都算唔錯。
佢仲透露，一家人仲未去慶祝住，要等過晒嚟緊嘅多個頒獎禮後再去慶祝。除咗王英偉做主席之外，今次藝發局仲出現好幾位新面孔，包括信和集團主席黃志祥嘅千金黃敏華。政府尋日亦宣布委任黃士心囝囝、康泰旅行社董事總經理黃進達出任郵輪業諮詢委員會成員，睇嚟政府對班名人二代重用有加。