政情：夏佳理打機了解西九
轟動全城嘅摑警案主角Amina，除咗係終審法院常任法官包致金嘅姪女，其實亦係行政會議成員兼西九管理局成員夏佳理嘅外甥女。前日西九文化區第二階段諮詢正式開波，首次展出三位國際級建築大師嘅概念設計圖則，久未公開露面嘅夏佳理亦帶埋太太到場率先觀賞，仲玩咗幾吓由大師團隊設計嘅電腦互動遊戲，睇嚟並無因案件而影響心情。
立法會西九小組委員會成員涂謹申，亦係其中一位首批獲邀到場參觀嘅嘉賓，佢太太蘇麗芬亦喺現場，不過兩人全程無接觸。原來本身做政治公關嘅涂太，前日係以西九公關身份在場工作，當然唔方便同老公打情罵俏喇！
阿涂睇完三位大師嘅大作後，話個人比較欣賞雷姆．庫哈斯嘅「文化 新尺度」設計，但唔係因為佢最靚，而係貪佢建議起條橋駁番去九龍西市區，有助解決當區現已非常嚴重嘅交通擠塞喎。何解咁講？皆因佢係九西直選出嚟嘅立法會議員囉。