政情：飛bra男切「蔡」無菜刀
社民連早前放風，揚言喺明年區議會選舉狙擊民建聯票倉，擬派出「飛bra男」錢偉洛落北角錦屏硬撼蔡素玉（蔡菜子）。尋日飛bra男正式向蔡菜子下戰書，喺北角地鐵站附近開設流動辦事處，幫手處理街坊投訴。飛bra男為打響頭炮，帶咗幾十包紙包飲品同兩支大可樂，買埋乳豬請街坊食，仲帶咗十棵菜心嚟切，暗示要砌低蔡菜子。不過，睇嚟佢今次出師不利，皆因萬事俱備，點知冇人記得帶把似樣嘅刀，最後惟有搵把餐刀頂檔切菜同乳豬，冇晒氣勢，蔡菜子睇到可能都係得啖笑！
其實所謂嘅辦事處，只係一張枱仔、一個易拉架加一個大聲公，每逢星期二、四放工時間喺北角地鐵站附近擺檔，處理吓法團問題；如果希望做法律諮詢，就要先行預約。呢啲流動辦事處隨時可收檔，慳皮又靈活。「維園阿哥」任亮憲都有去撐場，但社民連其他立法會或區議會議員就全部失蹤；佢話考慮緊喺將軍澳或沙田出選區議會，下個月可能都會搞個流動辦事處，開始做地區事務喎。