政情:葉太撐廖潔明屈奇安爭區選

明年區議會選舉戰情激烈,除傳統政黨寸土必爭外,過去較少涉足直選嘅紀律部隊人員,亦可能加入戰團,消息指,警務督察協會主席廖潔明同消防處救護員會主席屈奇安,分別有意搶灘九龍東選區,若然當選,曾任保安局局長嘅匯賢智庫主席葉劉淑儀競逐二○一二年新增五席區議會「超級議席」,會唔會更有利攞提名呢?我哋尋晚向葉太查詢,佢話有同屈、廖談論過二人參選一事,但就話無傾過「超級議席」問題。

紀律部隊工作性質敏感,按選舉法例,唔可以參選區議會同立法會,不過,屈奇安現已處於退休前休假狀態,廖潔明明年八月初亦會退休,啱啱趕得切報名參選十一月舉行嘅區議會選舉。消息流傳,兩人連選區都揀好,家住采頤花園嘅屈奇安將出戰采頤選區,廖潔明就攻觀塘區,如果區選成績滿意,二人更加唔排除出選一二年立法會。由於過往較少退休紀律部隊人員拉隊殺入直選,葉劉淑儀競奪一二年「超級議席」遂不脛而走。

我哋問屈奇安係咪參選區議會,佢承認正在考慮之中;廖潔明就話未有決定。紀律部隊人員總工會主席林國豪指,知道屈奇安有興趣參選區議會,至於一二年立法會選舉,則言之尚早,總之屈奇安選唔選,都屬個人決定,唔係代表總工會出戰咁話。

或有助「超級議席」提名

紀律部隊圈子流傳,曾因擔任入境事務處處長而成為香港首位紀律部隊女首長嘅葉太,同廖潔明及屈奇安勁熟,葉太做咗立法會議員後,三人亦不時聚頭。葉太承認,曾與屈、廖二人談論參選區議會,亦鼓勵佢哋出戰,又指二人有意參選嘅理由,係自○二年公務員減薪,已大感公務員需要參政爭權益,尤其今年初公務員被減薪百分之五點三八,立法會內無一個政黨願意為佢哋發聲,於是令屈、廖嘅參政決心大大提升,如果廖、屈能夠當選,將係紀律部隊參政嘅第一步咁話。

至於若然屈、廖當選區議員,一二年會唔會為葉太提名參選區議會界別「超級議席」,葉太話佢哋無談論到咁長遠嘅事,佢自己對參選「超級議席」暫時亦未想到咁具體喎。