政情：陳健波住豪宅靠慳家
立法會保險界代表陳健波自詡「最健康立法會議員」，一星期跑步三日，三年來風雨不改，近月加碼做埋GYM，喺住所貝沙灣樓下嘅會所秘密練兵。健波唔聲唔聲住貝沙灣豪宅，身家唔少，佢笑言捱咗三十七年先有今日，寄語年輕人置業要慢慢嚟。
早前一個星期日，健波晨早七點鐘就喺貝沙灣對出嘅公園跑步，話咁快用半粒鐘跑完約四公里。健波返屋企沖個涼，再直踩會所做GYM，由頭練到腳，收腹、舉啞鈴，仲拉背肌。出一身汗後，健波話壓力全消，人都精神爽利喎。
寄語年輕人多儲蓄
健波又由跑步講到置業，細數人生路上並非一帆風順。當年會考取得十七分，夠分升中六，畢業後考入恒生銀行當練習生，月薪一千元。健波好慳家，每月只花五十元，其餘九百五十元就交給媽媽儲起來，九年後終於儲夠首期，喺荃灣區買第一層樓。
之後事業有成，健波愈搬愈豪，由置富花園、海怡半島到中半山，年多前購入貝沙灣千四呎豪宅，帳面獲利唔少。佢咁投資有道，健波謙稱今日嘅成就，係努力加運氣。佢寄語年輕人努力工作，多儲蓄，辛苦耕耘，終有一天會嘗到豐富成果喎。