【本報訊】多個香港熱門網上討論區，昨日都有熱論三個西九概念設計圖則，網民對三位國際級建築大師的作品有彈有讚，但對當局計劃三者糅合為最終方案表達憂慮，擔心會令西九變成「四不像」，最後「唔知起啲乜嘢出嚟」。
對於霍朗明的「城市中的公園」，有網民盛讚「夠清靜，香港真係好需要一個城市中的公園，我鍾意」，但有人認為「城市入面如果過多嘅草地、公園係一種浪費」。對於嚴迅奇的「文化經脈——持久活力」，有網民形容「最有活力最多元化」、「又有樹又有科幻嘅感覺」，但亦有指「太庸俗，第一感覺已經密集到抖唔到氣」。對於雷姆‧庫哈斯的「文化 新尺度」，有網民指「最好玩最切合主題」、「設計師好似幾了解香港個文化，但缺點係建築太密集」。
不過，不少網民對當局將三者糅合的做法不表認同，直指「咁呢樣會變成四不像」、「用一點五億買晒三個方案就係為咗可以左抄右抄」、「以為炒埋一碟就最好味」，擔心「到喉又唔到肺，最後又係嘥咗一舊可以用得更好嘅錢」。
有網民稱「總之一句講晒，起完出嚟，咩階層嘅人都會用得着，唔要住宅」，亦有人指應善用該大片土地興建居屋，又揶揄現屆政府「臨走都要用納稅人嘅錢立個假‧大‧空紀念碑」，以及質疑港府假諮詢：「不如估下政府內定邊個plan（方案）仲好！」