政情：星之子變Apps王 掘第一桶金
「星之子」陳易希早前同幾個朋友合夥創辦一間科技公司「Bull‧b Tech」，主要開發iPhone、iPad系統軟件，短短五個月，已經研發咗電子餐牌應用程式及專為香港教師減壓嘅遊戲程式，稍後更會推出一個嶄新嘅婚禮應用程式。佢好有信心話，公司一年內可以回本，願景係全世界嘅人都可以用到佢寫嘅程式喎。
公司名叫「Bull‧b」，原來陳易希係借用內地潮語「牛b」而改，「牛」嘅意思係好勁、好叻，希望間公司好「牛」喎。今年五月佢同同學喺科技大學嘅創業計劃比賽中得獎後，就萌生開公司嘅念頭，於是喺畢業後決心開咗Bull‧b Tech，依家公司四個股東都係佢啲朋友，仲係做平面設計嘅，喺設計軟件上互相交流意見。
「教師憤怒了」擦走壓力
香港教師壓力有幾大，相信大家都知，陳易希最新研發嘅程式，就專為教師而設嘅減壓遊戲「教師憤怒了！」，畀大家免費下載，玩家只需要喺模擬黑板上將「解壓良方」拖曳到書包，擦走「解壓劣方」，就可以將工作上嘅不快一掃而空。
陳易希透露，依家正努力研發唔同類型嘅程式，大部分都係免費下載，好似訂花、訂薄餅咁，其中一個係關於籌備婚禮嘅程式，佢形容會以得意及實用為主，最快年底會推出。以上嘅程式依家暫時仲未有支援Android系統，但佢話會徇眾要求，等ios系統穩定之後就會推出專為Android而設嘅程式。
陳易希覺得自己優勢在於喺第一代iPhone推出時已經開始寫程式，至今已累積咗一定經驗，而且佢寫嘅程式會着重速度同互動性，以爭取用家嘅支持。陳易希預計公司未來可以年賺百萬元，同時希望可以幫助到非牟利團體宣傳，解決弱勢社群喺生活上嘅不便。