政情：球伯引施祖祥入局
前貿易發展局總裁施祖祥（Michael）前幾日喺上市公司長江製衣同埋YGM貿易公司嘅股東會上現身，原來係兩間同系公司嘅創辦人陳瑞球力邀佢做獨立非執行董事，兩人仲有同鄉嘅淵源添！
球伯話，佢邀請Michael入董事局好多年㗎啦！但係Michael一直冇應承，直至今年三月先至成功引佢入局。Michael就話，佢退咗休咁耐，應該冇利益衝突喇啩！又話一九八四年佢喺貿易署任職時已同球伯相識，佢哋仲係東莞同鄉添！球伯忍唔住笑Michael：「佢係東莞人，但竟然四十幾年都冇返過去！」Michael聽罷都笑稱，後來係球伯帶佢返鄉下嘅！
退休高官做上市公司獨立非執董、顧問已係常態，君不見前金管局總裁任志剛密食當三番，但Michael好謹慎，今次係佢第二份職務，第一份係另一間上市公司太古嘅獨立非常務董事。