政情：陳易希返母校做校董
「星之子」陳易希剛剛喺科技大學電子及計算機工程系學士學位畢業，就同朋友合資開辦咗一間專門研發智能手機Apps嘅科技公司，積極發掘人生第一桶金。埋首創業之餘，佢都不忘飲水思源，回到母校中華基督教會譚李麗芬紀念中學，以年僅廿二歲之齡出任學校法團校董會校友校董一職，成為該校最年輕嘅校董會成員，為母校嘅發展出一分力。
話說該校剛剛於去年成立法團校董會，早前廣徵歷屆校友出任首屆校友校董，其中「星之子」獲得唔少校友大力推薦，仲成為選舉中嘅唯一候選人，喺冇對手、零壓力之下，輕易登上校友校董之位。「星之子」多年來獲獎無數，令到母校都跟住聲名大噪，校友校董一職睇怕都冇人敢同佢爭，到時佢又可以帶領一班師弟師妹，一齊探究科技創意領域喇。