中環耳目：陳茂波最愛中總家常菜
立法會會計界議員陳茂波（Paul），平時生活簡樸，飲食以清淡為主，佢經常要喺中環打躉，位於中環干諾道中嘅中華總商會會所，成為咗佢嘅飯堂，皆因喺度食到清淡嘅家常菜。卓妮日前就喺中總遇到阿Paul同朋友食晏，見佢點咗個八寶燉冬瓜盅、中斑兩味、鮮百合蜜豆帶子蝦球、法海蒲團同當紅炸子雞，仲有甜品生磨蛋白杏仁茶，認真豐富。
多味菜式之中，以「法海蒲團」最具特色，以薄得透光嘅腐皮將多款齋菜包裹成僧人打坐嘅「蒲團」形狀，相當的骰。至於中斑兩味就將中斑拆肉，煮成菜遠炒斑球及陳皮斑頭腩，兩種食法各有特色，但阿Paul就鍾意陳皮斑頭腩帶出嘅陳皮果香。中總嘅招牌當紅炸子雞，亦係阿Paul嘅至愛，佢大讚炸雞皮脆肉嫩，雞髀肉更加滑到無得頂。
坐得舒服 價錢合理
阿Paul話，平時同家人去中總食飯會比較簡單，例如叫個土魷蒸肉餅、鎮江骨、咕嚕肉或蒸條桂魚，兩至三個菜又一餐。咪以為中總招待富豪會好貴，其實價錢相宜。阿Paul透露，當年入會只係一次過繳交一萬元永久會費，而且菜式價錢合理，一餐飯平均每人百多元，咁嘅價錢又要坐得舒服嘅地方，喺中環確係好難搵到。
