中環出更：蔣震游水消暑兼養生
盛夏高溫令人吃不消，好多人選擇出埠旅遊避暑，但資深工業家震雄集團主席蔣震就氣定神閒咁話，大熱天時邊度都唔去，留番喺香港最舒服。蔣震兒孫滿堂，乖仔乖女經常帶佢外遊，照計暑假係祖孫三代旅遊嘅好時機，但佢話早前上深圳視察業務，當地三十六度高溫熱到飛起，所以諗諗吓寧願留番喺香港唞暑好過。
分享買股票心得
雖然香港無內地咁熱，但都係熱到出汗，究竟蔣震有乜消暑良方？原來佢位於大埔康樂園嘅大宅，有一個長達廿米嘅私家游泳池，佢每晚食完飯唞一陣後，例必落水游番四百米至瞓覺，嘅可消暑又可當做運動養生，難怪佢八十七歲高齡都咁老當益壯嘞！
近排股市升升跌跌，蔣震仲同大家分享佢嘅投資心得，話只會買兩隻股票，一隻係大笨象滙豐控股，另一隻就當然係旗下嘅震雄集團啦！
佢仲自爆喺滙豐跌至四十幾元時入咗唔少貨，至於震雄就更加係一有錢就會入貨，直情當係儲錢咁，但佢都提醒自己要因住嚟買，唔可以買太多，點解？一句講晒：「如果我買晒，咁不如唔好上市啦！」呢位老人家認真精靈。