政情：金勞詹淡出下屆唔玩
有「金牌莊家」稱號嘅金融服務界立法會議員詹培忠，一生豪賭，自創十二字常勝心法，就係「贏谷輸縮，心清數熟，夠毒知足」。不過，金勞詹從政，似乎無遵照呢條秘訣喎，佢喺立法會愈玩愈旺，游走於泛民同親中陣營之間，大小通吃，贏到開巷嘅佢卻打算收籌離場，下屆放棄競逐連任。消息話，金勞詹未有「欽點」立法會接班人，佢一退，一二年金融服務界勢起風雲。
我哋問金勞詹，有冇打算冧莊玩多一屆立法會，金勞詹果然心清數熟，指下屆應該會退落嚟嘞，當年佢因為官非被中途褫奪議員資格，○四年捲土重來參選金融服務界，係要向選過佢嘅選民交代。晃眼六年，三年前金勞詹患上癌症，如果兩年後能平平安安完成任期，做咗八年，都係時候全身而退啦，人生最緊要開心啫！哦，咁講法，金勞詹兩年後離場淡出議會，原來亦貫徹佢嘅豪賭心法，就係壓軸嗰兩隻字：要「知足」！
○四年金融服務界議席共有五人角逐，除咗金勞詹外，仲有競逐連任嘅胡經昌、全國政協委員張華峰、自由黨馮家彬，以及當時係港進聯成員嘅馮志堅，○八年金勞詹喺無對手下自動當選。我哋問金勞詹搵咗接班人未？佢話，自己無咁偉大，唔會幫人抬轎喎。
參選立法會，無話贏梗同必輸，某程度都係賭一鋪啫，金勞詹一退，無人揸莊，張華峰四人有賭未為輸，可能會再落場爭奪金融服務界議席都未定，甚至會引來其他人加入戰團，未來兩年，有心人會陸續浮上面，經紀行頭呢次一定好熱鬧。金勞詹話，高人指點佢，近期賭運麻麻，所以佢已經四個月無過澳門，要等到農曆十月之後，先至重出江湖。若然金勞詹淡出政壇計劃不變，無連任壓力，無牽無掛，到時佢想點賭都得啦！
願為阿Paul穿針引線
金勞詹謀退，對佢「徒弟」旅遊界議員謝偉俊（Paul）依然上心，指經濟動力胡兆英虎視眈眈，阿Paul一二年連任未言樂觀，但都唔係無橋，至少有兩條。第一，○八年阿Paul以三百二十幾票取勝，金勞詹可以再游說多一百五十間公司登記做選民，幫阿Paul穿針引線；第二，同中央講數囉，勸退其他對手。嘩，一二年立法會選舉仲有兩年，功能界別已經暗湧四起，咁刺激，做慣「莊家」嘅金勞詹最終捨唔捨得離枱唔玩o架？