中環出更：金刀梁忙裏偷閒買書睇
外號「金刀梁」嘅泌尿科聖手梁智鴻，除咗擔任行政會議成員外，又係安老事務委員會主席，工作排到密麻麻，莫講話去行灣仔書展，連去行書店都好少，難怪每次去親書店都會行勻全場，盡量掃多幾本書。上周六書展舉行期間，卓妮就喺中環太子大廈間BOOKAZINE書店入面見到金刀梁一支公喺度閒逛，佢聚精會神咁揀書，最後搵到幾本心頭好。
行勻書店角落
周末嘅中環人流唔多，當日卓妮喺BOOKAZINE見到金刀梁嗰陣，已經係下晝五點鐘，人流更少，見金刀梁差唔多行勻大部分角落，包括雜誌架又好，書籍架又好，幾乎都唔放過，佢抽過《Snow Flowers and the Secret Fan》、《Asia Spa Magazine》嚟睇，但睇得最耐嘅係講述香港歷史嘅《The Great Fire of Hong Kong》，最後佢揀咗幾本書到櫃面畀錢，然後快手放入公事篋離開。
金刀梁同卓妮講，星期六都要開工，見收工得閒就抽時間貢去書店睇吓書，事關平時無乜時間行書店，所以一場嚟到咩書都睇吓，唔怪得一睇就睇足二十分鐘。金刀梁嚟緊會同太太遠赴英國領取第十九個院士銜頭，呢次係英國皇家醫學院頒發內科榮譽院士畀佢，唔通佢買定啲書上機睇？
卓妮對上一次見到金刀梁，係佢參加DHL創辦人鍾普洋喺灣仔天地圖書舉行嘅新書簽名會，當時佢提過自己好鍾意睇書，仲即場買咗兩本有關孔子嘅儒家哲學精讀本。
卓妮