政情：林健鋒無份受勳巴西散心？
經濟動力召集人林健鋒（Jeffrey）係巴西足球擁躉，對巴西經濟發展都好有信心，佢下月會出發到巴西考察，開發商機。Jeffrey話，巴西係新興市場，製衣及電子業市場發展潛力好大。山長水遠去巴西，Jeffrey話肯定唔會錯過擁有三屆世界盃榮譽嘅雷米金盃（Jules Rimet Cup）同宏偉嘅聖母像，但當地蚊患嚴重，Jeffrey已做好預防措施，出發前最少十日注射黃熱病預防針，帶備防蚊膏等藥品。
梁君彥認生促局有瑕疵
講開Jeffrey，佢今年無得同親密戰友、4L之一嘅梁君彥（Andrew）一齊攞金紫荊星章，政界竊竊私語。Andrew尋日話，今次獲頒金紫荊，係政府以職訓局主席名義頒畀佢，肯定職訓局團隊嘅貢獻，言下之意同經濟動力無關。大家都知道，授勳委員會主席係同佢一齊出身於工業總會嘅政務司司長唐英年，問Andrew今次係咪好友唐唐提名佢，Andrew只係話：「呢個就無法揣測到喇，但職訓局成績有目共睹，非政治性報酬。」
其實Andrew喺任生產力促進局主席期間，一再爆出醜聞，被審計署公開批評，Andrew尋日都直認不諱，話任內確實係「有啲瑕疵」，但亦為生產力促進局做咗好多改革，包括加強對中小企嘅服務。不過，唔知佢戰友Jeffrey會唔會覺得不是味兒呢？