政情：立會趕抖暑通宵開會
立法會呢幾日開緊今屆會期最後一次大會，不過傾咗兩日都未埋尾，秘書處已經計晒數，分分鐘今晚十點都唔可以傾晒所有議程，預咗要通宵開會，唔少議員聽到面到青埋。何解傾足三日都完唔到會呢？說到底，政府同議員都有責任，所以邊個都冇得怨。
首先睇一睇政府衰啲乜。內會主席劉健儀前排先大鬧政府，不滿政府年年都拖到最後一刻先向立法會提交條例草案，搞到次次會期尾都要趕工，不過政府就意見接受、態度照舊，今年仍然堅持喺最後一次大會、即係前日先至提交極具爭議性嘅《最低工資條例草案》畀立會二讀辯論，議員意見好極端，所以根本冇可能一時三刻傾得完；加上今次政府唔肯喺草案內容上讓步，接受多啲議員嘅意見，搞到一眾議員合共提咗十幾項修訂，項項都要花大量時間討論再逐項表決，搞到廿幾個鐘都未傾掂，今日要繼續辯論同一議題。
爭取曝光 阻礙流程
不過搞到要通宵開會，唔係因為一條《最低工資條例草案》咁簡單，仲因為啲議員把握最後機會爭取曝光，好似近日唔少熱門議題政府都冇處理好，議員臨時喺大會議程上加插議題討論作最後衝刺，結果又拖長咗開會時間。好似民主黨李永達要求運用《立法會（權力及特權）條例》，要政府向立法會提交地政總署與天匯發展商之間嘅來往信件，不過建制派唔想落政府面，一定會大力反對，睇嚟冇三個鐘都未必傾得完。加埋由匯賢智庫葉劉淑儀提出有關冧樹嘅休會辯論，結果搞到今次大會開極都唔完囉。
其實立法會過去一年已好少通宵開會，對上一次已經係○九年嘅事，當時為財政預算案辯論到凌晨兩點幾。不過今次情況仲特殊，事關立法會主席獲邀去中東國家交流七日，星期日下晝就要出發，所以會議一定要星期六結束，問咗議員意見之後，主席尋晚十點完會前公布，今日必須辯論到完成所有議程為止。睇嚟今晚個個議員都冇得瞓，打定輸數喺立法會開天光都得嘞！