政情：煲呔曾濫用iPad當貓紙
煲呔曾自編自導自演嘅起錨騷，凸顯咗佢記憶力衰退，做每件事、講任何嘢都要睇貓紙嘅習性，連內地地方官都比不上。好似早前佢騎劫東區區議會休漁期，上台搶咪嗌起錨睇貓紙；又喺一條一分鐘宣傳政改嘅短片中竟然先後睇六次貓紙；同公民黨黨魁余若薇辯論，又係頻頻黑面兼睇貓紙。以上種種，令大家更加相信煲呔曾冇貓紙乜事都做唔成。
可能畀人鬧得多，煲呔曾尋日發表網誌，話自己早兩日去立法會出席答問大會時冇再用貓紙，改為IT新產品iPad。煲呔曾仲為用貓紙辯解，話自己對所有政府政策都好清楚，但個別數據同細節就未必可以一口講出，所以喺答問大會上用「參考書」係務實之舉，可以為自己嘅說話負責，而改用iPad更令佢喺議事堂內與議員互動更暢順喎。
好可惜，從佢用iPad嘅手勢同動作就可以知道，佢根本唔熟部機，對佢嚟講，iPad其實只係一張貓紙，唔同嘅只不過係呢張貓紙變咗電子版咁啫！