政情：論壇控制入場防亂
自從「城市論壇」畀一大批憤青攻佔之後，嘉賓被包圍嘅情況真係屢見不鮮，以白鴿黨主席何俊仁為例，上星期出席完節目後畀憤青們圍到實一實，足足用咗廿分鐘，動用過三十警力先可以安全離開，主辦單位今次精喇，推出幾招新措施去保護嘉賓。
卿姐黃碧雲抗議語言暴力
首先，大會預咗二百二十張飛，觀眾入場要攞飛入場，派晒就唔畀入；第二，大會用鐵馬圍出一條「逃生」通道，保障嘉賓安然離場；第三，節目完結前，警方早早就用鐵馬同人牆隔開現場觀眾同嘉賓，嘉賓車離場後先開番條公眾通道，班憤青都無可奈何。最後一招就係向所有入場觀眾派發一張規則，呼籲觀眾維護人身自由同保障對方尊嚴同安全。
唔止主辦單位，民主黨副主席劉慧卿同普選聯副召集人黃碧雲呢兩位嘉賓都有絕招對付班憤青，就係不斷要求佢哋唔好用粗口表達意見，黃碧雲仲重提網上有人話要強姦劉慧卿件事，搞到全場噓聲四起，不滿佢哋轉移視線。無論台下觀眾講乜，兩位阿姐都會拉到去語言暴力呢方面，真係高招。