政情：陳祖澤撐施文信接棒

唔再做多屆

聽到John要走，有啲依依不捨，問佢有冇機會再做多一屆，佢好瀟灑咁話：「唔會啦！」對於繼任人施文信，佢話一定會支持佢。計埋做董事、副主席，John話佢喺馬會已十幾年，自認為馬會出咗唔少力，點知佢話鋒一轉，將話題轉至世界盃足球賽，話佢喺馬場鋪嘅草皮一定靚過南非足球場喇！原來佢嫌南非足球場嘅草皮一踢就爛，馬場嘅草皮就經得起萬馬奔騰嘅考驗。

後來見到施文信，梗要第一時間恭喜佢。佢好謙虛咁話，佢好享受依家做副主席嘅日子，至於係咪升呢做主席，等八月底董事會改選至算。施文信本身係特許會計師，仲係滙豐非執行董事同公務員敍用委員會成員。佢上任後，同馬會行政總裁應家柏並肩作戰，應家柏係德國人，主席同CEO都係外籍人士，係近年少見。