政情：梁卓偉畀腦癇症考起
食物及衞生局副局長梁卓偉（Gabriel）係「番書仔」一名，平日面對傳媒用英文答問題易過食生菜，佢英文講到「嘞嘞聲」，唔等如搞得掂啲又長又難明嘅醫學名詞。Gabriel尋日就自爆，讀醫生涯入面曾經畀一種疾病玩殘，就係最近正名為腦癇症嘅癲癇症。
當然唔係話Gabriel身體有咩嘢問題，實情係佢尋日出席一個關注腦癇症活動時，回想當年喺外國讀醫科，一般嘅英文醫學名詞都尚算可以應付，但偏偏讀到呢個病症時，就頭都大埋。Gabriel話病症本身都分作好多不同類別，最慘嘅就係全部都係法文嚟，惟有死記硬背。法文有幾難？如字典裏面中文簡單一句「十分差」、「幾差」，喺法文嚟講係好多個唔同嘅字。
講完求學血淚史，Gabriel話腦癇症其實係腦電波出咗問題，同心律不正無乜分別，但係大眾對佢唔係好了解，患者有時仲會畀人歧視，希望大家多啲關心同支持患者同家屬。