政情：邱騰華低招Sell熄匙
環境局局長邱騰華自去年慳電膽事件被群起攻擊，之後轉趨低調，最好唔好畀人見到自己。近日停車熄匙法案立法會闖關，邱不得不「蒲頭」力銷，為重振聲威，佢更不惜自揭瘡疤，自爆當年年少氣盛，亦試過停車唔熄匙，結果被旁邊一個小販當頭棒喝，力斥：「你涼冷氣就享受，我就難受！」此後明白停車熄匙嘅重要。不過呢招自爆式硬銷，業界擺明唔多受落，繼續炮轟唔客氣。
邱騰華尋日出席停車熄匙嘅法案委員會，眼見七十幾個與會團體，三分之二都要求撤銷草案，即出新招自爆廿六年前，喺中環停車時亦試過唔熄匙涼冷氣，結果被路邊小販力斥，佢當時頓覺自己自私，以後亦主動停車熄匙，藉此呼籲業界應考慮從別人角度出發，同意立法。
未知是否招數太低，議員梁耀忠首先唔收貨，反批評佢嘅言論等同暗示業界自私，根本係偏見，仲話：「唔係業界自私，而係當局從來冇解決過車廂會唔會因為太熱等技術問題。」連議員都咁講，業界反應當然更激，繼續開口炮轟。邱局長下次仲有乜新招呢？