政情：警花貶「女神」做凡人
唔知係認真打壓定係港府低能，警隊廿一年來首次沒收「民主女神像」，搞到群情洶湧。警隊見件事不能再拖，尋日同支聯會傾掂數，交還「民主女神像」。警隊由頭到尾唔認衰，堅持係依法辦事，但係就派出警花——警察公共關係科署理總警司曾豔霜出嚟解畫，唔知係咪想緩和吓氣氛？
雖然Madam曾台型不俗，講說話都算清晰流利，但料就欠奉，一味重申警隊立場，仲好專業咁形容兩個「女神像」為「銅色人像」同「白色人像」。有記者問佢，點解以前「民主女神像」擺喺時代廣場唔告，依家又拉又鎖？支聯會拒絕簽署聲明，警方有乜回應？Madam曾一於「一句到尾」，話所有執法都係合法同合理。
其實Madam曾今次都係捱義氣，事關警察公共關係科一哥吳家聲放緊大假，避過一劫。Madam曾以前曾經破新三狼案，之後又被派駐國際刑警組織法國里昂總部，成為亞洲首位女性代表，見慣大場面。聽聞佢喺法國，仲有唔少裙下之臣添。