由天星碼頭、皇后碼頭以至菜園村遷拆，一班爭取保育嘅「八十後」青年人被標籤為激進一群。曾經喺○七年到中環皇后碼頭與保育青年對話嘅發展局局長林鄭月娥，尋日上電台重提舊事，暗批班青年嘅表達方式過激，又趁機同中央交心，話自己讀大學時經常討論國情，參加交流團北上，成個人忽然「紅」起來。
林鄭自爆，自己三年大學生活大部分時間唔係讀書，而係參與社會事務和討論國情，當年國家改革開放，佢都有參加北京清華大學交流團。林鄭話，如果好似佢當年咁認識國家和社會並無不妥，最重要係表達方式及有獨立思考能力，將不同意見融會貫通後形成個人睇法，即係叫大家唔好跟風、人云亦云。林鄭被視為下屆政務司司長熱門人選，呢個時候借青年人染紅自己，莫非想向中央交心？
林鄭又話，自己都年輕過，所以樂意走入群眾與青年人溝通，但佢發現近期嘅群眾活動帶有謾罵：「我好唔受得成日聽到『可恥』兩個字，英文Shame或Shameful都無咁難聽，唔知點解我哋女士們對個『恥』字真係好有意見。」點解今日高官落區變成過街老鼠，林鄭都應該反省吓囉。