政情：煲呔曾起錨責沉船

「蔡母遇險」籤文寫道：「狂風驟雨打船蓬，溪畔桃花盡落紅，驚醒漁翁春夢熟，持篙撐去失西東。」狂風打在船上，漁翁險象環生，撐船撐到失晒方向，漁翁意指掌舵人煲呔曾，暗示本港政治環境凶多吉少。無獨有偶，煲呔曾尋日率領問責官員鬼祟落區做騷推銷政改方案，竟然將口號改為「起錨」，將船錨收起讓艘船開動前進，寓意要通過政改方案讓政制發展前進，完全係順應籤文啟示繼續發展。

醜聞頻頻 民望插水

不過，煲呔曾撐船遇着狂風大雨撐到失晒方向之餘，亦受自己嘅政治誠信、管治劣迹及醜聞所拖累。煲呔曾○五年上任以來，成事不足，敗事有餘，○七競逐連任特首時揚言就政改「玩鋪勁」，點知最後好似「八萬五」房屋政策咁一早無咗。及至去年因為推銷慳電膽現金券而發生涉嫌益親家醜聞，民望大跌，到近期爆出涉嫌要求立法會主席辭職投票支持政改風波，民望再度插水。

煲呔曾近日亦因為遲遲未能表態會否喺立法會補選中投票，補選後仲邀請「五區公投」總發言人余若薇進行電視直播辯論，惹來其他泛民不滿，就連建制派都群起攻之，即使反對「五區公投」嘅市民亦不滿，所以港大最新嘅民意調查發現有超過一半受訪市民反對煲呔曾做特首，係佢上任以來首次過半數，更拖累政府民望急跌破底，有四成三市民對政府表現表示強烈不滿。

煲呔曾今次拖埋司局長上街玩「起錨」做大騷，倘若政改方案仍未能通過，煲呔曾分分鐘玩完，攬住船錨與七百幾萬人齊齊等沉船，下場係點只有天知道。