阿堤斯湖人英雄
西岸決賽尋日上演最關鍵嘅天王山之戰，全場鍥而不捨追分嘅鳳凰城太陽，終在完場前3.5秒追成平手，不過幸運之神始終站喺「紫金兵團」湖人一方，阿堤斯完場前0.7秒執到高比拜仁來球起手入籃，以103比101絕殺鳳凰城，助湖人總場數領先至３比２，只要周日再贏就可以連續三季進身總決賽。
今場賽事都算峰迴路轉，湖人在全場領先下，竟被鳳凰城在第四節連環追分，差啲被逼至加時。當賽事剩餘20秒左右，鳳凰城仍落後３分，必須以三分球作最後攻勢，雖然鳳凰城連射兩球都「炒粉」，但同時亦搶番籃板，最終積遜李察遜在3.5秒前第三射命中，追成101平手。
一擊得手罪人變英雄
正當眾人以為需要進入加時之際，湖人領袖高比拜仁接球後射三分「大針」，不過阿堤斯衝前接得來球，更成功在完場前0.7秒起手命中，射出絕殺一擊，賽後即激動得與高比仔攬作一團。今場阿堤斯９次起手僅中２球得４分，本應表現極差，但最終卻由罪人變英雄，難怪佢賽後都話：「上半場嗰個阿堤斯，根本唔係我嚟，到下半場先至似番啲樣！」而今場轟入30分嘅高比仔亦解釋最後一擊：「當時我起手已經見到阿堤斯走入去，我好希望佢可以接到球，最終佢成功。」
功虧一簣嘅鳳凰城，射手積遜李察遜亦由功臣變罪人，皆因佢最後關頭未有睇實阿堤斯，畀佢攝位搶走「空氣波.」，最終射出絕殺球。湖人贏波後，總場數領先至３比２，周日第六回合將會重返鳳凰城上演。
■本報綜合報道