政情：甘威預咗甩身睇世博
立法會調查民主黨議員甘乃威涉嫌求愛不遂怒炒女助理嘅委員會啱啱開始傳召甘威展開聆訊，預計七月立法會休會前可以完成調查，再着手寫報告，加上依家女助理態度曖昧，分分鐘唔會出面指證甘威，相信最後甘威甩身機率好高。甘威已決定九月份帶埋一家大細去上海參觀世博，唔知係咪順便慶祝埋佢成功甩身呢？
甘威同我哋話，呢幾屆都有去參觀世博，得出一個心得，就係唔需要做首批參觀者，仲要預多幾日時間先睇得晒所有展館。佢話之前喺日本名古屋睇世博，預得兩日時間，等入場又大排長龍，搞到乜都睇唔到，所以甘威決定早前唔跟立法會世博團走馬看花，反而預晒時間，趁九月休會同屋企人去上海行一轉。咁又係，九月立法會休會得閒啲，到時上海天氣又好啲，加上上海世博係大盛事，一開幕肯定會吸引好多人蜂擁而至，反而遲啲先去，到時人少啲，各個展館又會運行得順暢啲，咁佢哋去參觀就可以順利好多。最重要係到時可以放低包袱，玩都玩得輕鬆啲！