政情：林D9自封外公同80後互片

政制及內地事務局局長林瑞麟因為一個「公公」外號，早前同余若薇喺《城市論壇》針鋒相對，仲公開反擊，叫余若薇唔使叫佢「外公」咁抬舉。立法會尋日就政改方案舉辦公聽會，林D9被八十後青年戲謔為明朝太監嘅「公公」，佢同樣即場反擊，揶揄話依家即使叫佢「外公」，再難為政治攞分。公聽會結束，八十後嚴敏華就反寸林D9，批評林D9自稱係佢外公，簡直係侮辱佢外婆，事關佢覺得林D9只係慈禧身邊嘅太監「小李子」李蓮英！總之互不相讓。