政情：黑英瞓身環保獲殊榮

黑英周一喺個人網誌《草雲居》自爆呢個喜訊，佢話啱啱收到來自英國嘅信，原來係皇家氣象會寄來嘅證書。黑英喺上世紀七十年代曾經喺倫敦學習氣象，當時就入咗呢個會，轉眼已三十幾年。佢話估唔到離開英國咁多年，仲有人記得佢。黑英又不忘自嘲一番，話呢個級別嘅會員一向只限廿人，唔知依家係咪放寬咗呢？

對於自己獲此殊榮，黑英估計可能係香港天文台嘅工作對業界確實有貢獻。不過我哋睇番張證書嘅陳述，其實佢哋更加欣賞黑英喺天文台工作以外嘅熱誠，尤其是近年高聲疾呼各界關注氣候變化。證書仲引述佢接受世界自然基金會嘅訪問，話氣候變化係全人類面對嘅問題，千祈咪睇小一己之力而唔去做呀！