政情：大輝怒省足總籲整頓

眼見本地足球壇再三發生打假波醜聞，熱愛足球運動嘅大輝心有慼慼然，話足球壇貪污醜聞已令香港足球事業衰足二、三十年，好似去年三月地區球隊屯門普高涉嫌打假波，足總跟進後不但無向外界交代事件，事發後又無訂立有效機制防止類似情況發生，結果一年後嘅今日再次爆出打假波醜聞，完全反映足總嘅財政、管理及專業水準極差。

大輝仲借早前政府公布嘅足球顧問報告向足總發炮，建議政府往後撥款予足總前必須三思，最好係整頓足總後才批出撥款。雖然大輝表面上狠批足總，但明眼人睇得出佢大大腳將個波省向足總主席梁孔德。梁孔德上任三年來嘅負面消息多籮籮，被指大花筒使錢，最大單就係○八年接辦賀歲盃，以千萬元成本邀請克羅地亞夏德等球隊訪港，結果錄得嚴重虧蝕，近期要求佢下台嘅聲音更此起彼落。

梁孔德：打假波非足總問題

尋日喺個論壇見到梁孔德，佢就反駁話：「林大輝最鍾意講嘢，但佢都唔知我哋（足總）做咗啲乜嘢，上次（屯門普高涉嫌打假波）已經同廉署定咗啲指引，亦都派咗畀球會啦！」佢強調，打假波係球隊問題，並非足總嘅問題。佢話：「上次意大利打假波，都係罰球會啫，唔係罰意大利足總吖。」

對於足總出現財赤，梁孔德就承認近兩年足總確係財政緊絀，事關收入少，開支大，但就不涉管理問題喎！一個組織出現財赤，唔係理財不善又係如何引致呢？相信一切自有公論！