中環出更：政商名人慶祝母親節各有各溫馨
所謂「百行孝為先」，政商界「乖乖牌」孝順仔女，個個都係大忙人，要喺母親節陪阿媽慶祝唔容易；即使有時間，又要為送咩禮畀「知足牌」阿媽而頭痛。計卓妮話，仔女咁孝順，收粒鹽嗒落都係甜嘅啦﹗
身為香港第一個恒生銀行女大班嘅梁高美懿，出名係孝順女，不過呢個母親節就未必能夠陪足媽咪一日，所以上星期三佢趁住夜晚有時間，同媽咪十指緊扣入沙田馬場食飯預先慶祝，兼捧妹夫隻愛駒場。梁太全晚同媽咪形影不離，佢話是夜都係慶祝活動之一，不過正日有嘢做，希望到時抽到時間陪媽咪食飯，如果唔得都會補番數。
梁太孝順 媽咪冧爆
卓妮問高媽媽想收咩禮，佢甜絲絲望望梁太話︰「個女好孝順我！」明顯梁太早就送咗「孝順」呢份大禮物畀媽咪啦！
同樣出名孝順嘅醫管局主席胡定旭，尋日上咗四川做災後重建，星期一返嚟又要忙開醫管局一年一度嘅東南亞交流會，所以佢好頭痛，唔知點分身同阿媽慶祝，但正日慶祝唔到，佢話都一定會補祝。至於要去上海睇世博嘅立法會議員林健鋒同黃容根，人在世博心繫媽媽，講明會喺上海買禮物補數。
蔡加讚為禮物頭痕
玩具大王蔡志明囝囝蔡加讚就為禮物而頭痕，事關蔡太名牌厚禮乜都有，要打動媽咪非要「腦筋急轉彎」不可。平時影咗媽咪唔少靚相嘅加讚，諗住搵一個靚相架放媽咪嘅靚相，再同姐姐加怡一齊炮製美食送媽咪，咁有心意，相信蔡太一定好冧。早收到風嘅蔡太就搞笑話︰「佢話送心意禮物畀我，睇吓點！」
出名忙碌嘅「眾人媽打」李麗娟，母親節去美國，囝囝劉堃提早同家姐上媽咪屋企食飯，仲會有神秘禮物添！立法會秘書長吳文華（Pauline）生日同母親節都喺上海過，所以囝囝同孫仔已經提早同佢慶祝，仲送咗旅行用品畀成日出trip嘅佢添。
至於仔女仲細嘅曾智明太太黎瑞恩同議員李慧琼，就等緊收仔女嘅心意禮物。小恩子話佢七歲嘅囡囡平時最鍾意寫心意紙仔畀佢，呢幾年仲會同細佬畫卡畀佢，所以已經儲咗六張。李慧琼讀小二嘅寶貝女亦一樣鍾意做手作仔冧媽咪，總之各有各溫馨！
卓妮