政情：民記杯葛投票拉隊過大海

民記創黨十八年，以政黨名義訪問澳門，過往亦試過一次。○六年民記中委約二十人，過大海拜訪澳門政府、立法會，參觀漁人碼頭同賭場，當年仲係立法會議員嘅蔡素玉仲同記者爆料，澳門有人請佢哋食「五星級豪華晚餐」，有十六頭吉品鮑、官燕、海參同新鮮至極嘅龍蝦，節目咁豐富，四年後嘅今日再訪濠江，絕對唔出奇，之但係，日期揀正「5‧16」，相信唔止巧合咁簡單。

工聯「冇行動」反補選

我哋向民建聯求證，該黨一名高層強調，「5‧16」訪澳團仍在籌辦之中，澳門方面尚未覆實，仍存變數，所以不便透露詳情，至於點解揀「5‧16」離港，係咪同「五區公投」有關，該名高層嘅解釋係：「5‧16」大家最齊人。咁又係嘅，民記一早講咗杯葛「公投」，成班骨幹政治正確，嗰日唔使投票，咁得閒最好出埠啦。四年前，民記總結澳門行程時，大讚澳門夠和諧，少政治爭拗，如果「5‧16」佢哋喺澳門講番同一番說話，又真係幾別具深意嘅。

民記杯葛補選，由唔派人參選，到唔呼籲支持者投票，再到依家用腳抗議，打算「5‧16」離港，果然義無反顧杯葛「公投」。其他建制派政黨就無咁政治正確嘞，工聯會、五散人、經濟動力同自由黨，都話無計劃喺「5‧16」離港，或者搞大型集體活動，就連每年七一都搞港島巡遊嘅工聯會，都話無打算喺「5‧16」搵節目。

工聯黨團召集人黃國健話，工聯批評「公投」違法，立場清晰，毋須再用其他行動表達，又話無行動就係反「公投」嘅最有力行動，大家「5‧16」如常生活，飲茶睇戲大覺瞓，就係杯葛「公投」嘅最佳抗議招數咁話。