中環耳目：許浩明推介太平館葡國雞
喺商界歷練豐富嘅香港資源執行董事許浩明（Herbert），三年前海域集團爆煲後，不但冇學其他執行董事「跳船」保命，反而留守協助清盤、重組，直至引進恒基地產主席四叔李兆基、全國政協委員黃英豪等新股東，令海域重生為香港資源，呢一役令佢贏晒口碑。卓妮早前撞到Herbert，佢談笑風生，成個人鬆晒，仲同卓妮推介太平館美食添。
150年歷史
Herbert係太平館嘅忠實擁躉，已幫襯佢哋近廿年，幾乎間間分店都去過，佢嘅首選係葡國雞飯。咁係咪同朋友一齊去？佢有啲猶豫咁笑謂，「有時去睇吓自己嘅物業，咪順便食埋飯囉！」吓？巡舖？咁多投資？Herbert好謙虛咁話：「少少啦！」見佢笑得咁開心，啲物業實增值唔少。
太平館第五代傳人徐錫安同卓妮講，佢哋已經有一百五十年歷史，葡國雞飯由成立第一日起，已經係招牌菜式，用嘅全部係鮮雞，鮮雞先放喺葡汁浸到八成熟，再放入焗爐焗埋嗰兩成。做個葡汁好花工夫，首先用牛
、雞骨及紅蘿蔔熬湯，再加入黃薑粉及其他香料製成葡汁。好多城中名人都係太平館嘅擁躉，好似醫管局主席胡定旭嘅母親大人、中央政策組首席顧問劉兆佳都好鍾意佢哋嘅葡國雞。
