中環出更：肥亨為經濟論壇買老西
做咗中策集團主席嘅前商務及經濟發展局局長馬時亨，終於瘦身成功，可惜以前買落嘅闊身西裝統統唔啱着，好在肥亨離開官場後無乜機會着西裝，所以冇買過一套新西裝。
由「創業基金會」同理工大學合辦嘅「創造性經濟論壇」尋日搞咗個預告午宴，論壇主講嘉賓之一嘅肥亨都嚟撐場，見佢穿上一套意大利牌子Pal Zileri直條西裝，睇落清瘦晒。原來套西裝最近先買，馬太親自揀，成套至少萬五銀，肥亨一口氣掃咗兩套，咁揼本有原因，事關五月十號要出席論壇，會上粒粒巨星，包括微軟公司全球資深副總裁張亞勤、理大校長唐偉章及創業基金會主席李懷璞等，肥亨話唔可以失禮，所以特登去置裝。
探討企業社會責任
講番個論壇，將以炙手可熱嘅「創造性經濟」為主題，肥亨係前財金高官，開正佢嗰瓣。肥亨話呢個議題主要探討企業盈利同社會責任如何共存，夠晒前瞻性。
事關金融海嘯後，唔少市民覺得部分企業「利」字當頭，埋沒良心，係時候提醒啲大老闆要照顧吓貧苦大眾利益，締造雙贏局面。想知道肥亨有乜高見，記得到時洗耳恭聽嘞。