政情：劉勵超翻閹做顧問

今年六十歲嘅劉勵超，七二年加入政府做助理貿易主任，八二年轉做政務官，為官近三十載嘅佢，九七至○一年未改行問責制前，佢已經做規劃地政局副局長；○二年升任地政總署署長，一做五年，任內發生過嘅紅灣半島事件、嘉亨灣事件同鄉議局當然執委香灼璣「香居僭建」風波，佢都無被捲入漩渦，一直保留清白之身，直到○七年六月底榮休。

反映港府人才不足

劉勵超享受咗三年退休生活，近期佢嘅身影再喺下亞厘畢道活躍，佢嘅卡片套裏面，竟然仲有特區政府嘅卡片，銜頭由「地政總署署長」改為「食物及衞生局顧問（私家醫院發展）」。原來，施政報告去年提出將醫療作為本港六大產業之一，政府推出四幅地皮供私營市場興建醫院，需用熟悉土地政策嘅人幫手睇實項目，以免出事，所以去年十月搵劉勵超回巢幫手，以合約形式再續主僕未了緣，而劉勵超亦欣然答允。

劉勵超尋日同我哋講，依家主要工作係審核申請發展嗰四幅私家醫院用地嘅意向書，需要一定時間；佢嘅合約六月到期，言下之意續約機會都好大。

劉勵超講過，自己已將人生寶貴嘅十年，放喺香港嘅地政規劃工作上面。嘩！人生有幾多個十年？特區政府裏面又有幾多退休高官喺土地政策浸足十年？劉勵超呢類人理應好快成為發展商嘅頭號獵物，所以，劉勵超選擇退而不休，而唔係去食發展商茶禮，反而食政府回頭草，呢個消息好值得官門中人振奮，至少打破地政官員被指「官商勾結」嘅宿命。

其實以劉勵超對地政規劃嘅爛熟程度，政府搵佢幫手，可謂搵啱人選；只係從另一個角度睇，亦反映政府之內人才不足，資深政務官斷層，再過十年八載，可能「媽打」劉李麗娟同啱啱退休嘅副申訴專員余黎青萍一班舊人全部都要回朝，做晒三司十二局嘅顧問，幫手支撐港府半邊天！