政情：紅衫軍示威陳有慶冇有怕
泰國反政府「紅衫軍」來勢洶洶，嚇到外國遊客退避三舍，香港啲旅行社都有一排停晒出泰國團，但身為泰國巨富陳弼臣之後嘅全國僑聯副主席陳有慶就大派定心丸，叫大家唔使驚，佢話佢嘅家族喺泰國投資嘅股票，更加升咗百分之五添。
股市上升派定心丸
陳有慶前日朝早由西安返港，原來係參加完祭黃帝陵活動，佢話身為黃帝子孫，慎終追遠好應該，太太都陪佢一齊去。離港兩日，陳有慶依然關心家鄉泰國嘅最新局勢。泰國政壇會否變天？佢話唔評論，但心情就絕不擔心，原因係泰國人視「紅衫軍」示威係「例行公事」，時不時都有發生，所以毋須太緊張。
唔信！？睇吓泰國股市就有啟示嘞。陳有慶話，佢家族喺泰國開設嘅盤谷銀行，近日股價反而升咗五巴仙，佢投資嘅泰國股票亦升咗，股市向來反映經濟前景，證明泰國局勢唔係想像中咁灰。