政情：顏吳餘英乖仔接棒家族生意
美昌集團副總裁兼廠商會副會長顏吳餘英（Katherine）日前為經濟動力大開韶關玩具廠房之門，讓近百名大學生參觀，當日除咗Katherine同丈夫顏培英負責接待之外，顏家接班人顏志永（Roger）都有現身幫手。Roger去年獲頒香港青年工業家獎，而Katherine早在九六年已獲同一殊榮，兩母子皆獲同一獎項，分外珍貴。
勉勵大學生投身工業
Katherine對愛子獲獎固然開心，但更值得高興係屋企生意有第二代接棒，一家人齊心分工合作管理好間公司。Katherine與丈夫四十年來對工業發展充滿熱誠，而且不斷創新產品，「Maisto」系列玩具成為國際市場知名品牌，所以Katherine勉勵大學生，話工業並唔係夕陽行業，因為就算經濟再好，如果無工業製造消費品，經濟活動都難以發展，期望年輕一代畢業後考慮向工業發展喎。