西九文化區管理局行政總裁個位，鐵定由過江龍倫敦巴比肯中心藝術總監謝卓飛擔任，文化界一直擔心搵唔識本土文化嘅外國人做會搞唔掂。管理局卒之出嚟補鑊，幫謝卓飛請番個行政總裁辦公室主任。西九管理局諮詢會成員黃英琦一聽到就十分之㷫，大鬧行政總裁麾下嘅行政總監都將會由本地人做，使乜疊床架屋請多個人？謝卓飛未上任已經問題多多，怕且上任之後只會愈嚟愈多。