政情：張永霖掃名錶升值唔賣
有「青樓名妓」之稱嘅張永霖（Linus），自從離開亞視後，生活依然十分風雅，繼續做佢嘅拍賣會常客。佢尋日單拖現身會展嘅蘇富比拍賣會，呢次口味有變，唔再舉手競投中國字畫，改行掃古董名錶，仲一口氣買咗幾隻添。
睇準心頭好出擊
Linus近年轉行做名錶玩家，趁蘇富比推出多款名貴腕錶拍賣，包括江詩丹頓、百達翡麗、卡地亞及勞力士等，機會難逢。Linus係拍賣會老手，但眼見現場有唔少「食力」嘅買家，舉手時打醒十二分精神，睇準古董名錶出擊，最後成功投得幾隻心頭好，Linus唔肯透露具體數目，但粗略估計，至少使咗近幾十萬銀，認真夠晒豪。佢笑言投錶旨在收藏，並唔係用嚟炒賣，就算啲錶升咗值都唔會賣喎。
外界一直好關注Linus嘅新動向，佢話擔任港大專業進修學院主席份工已經夠晒忙，暫時未有新搞作。問佢點睇亞視早前爆發股東爭拗風波，佢就話唔評論嘞。